SUN搞作：少膽虫手記：食臭蟹
淫賤黎一言不發，將一大個籮放喺枱面，引起眾人的目光。「腦細，乜嚟o架？」少膽虫機智問。「獎勵你哋嘅，嘻嘻！」淫賤黎得戚道。為食嘅肥豪立即狗衝過去，一手掀開蓋頂，赫見一大堆蟹，高興呼叫：「正呀，我最鍾意食蟹！」
少膽虫望一望堆蟹，就覺得唔對路：「點解啲蟹咁細隻，得手掌咁大！」「係喎，細成咁嘅……」肥豪搭嘴道。淫賤黎即時解釋：「識咩吖你哋！呢啲叫做蚊型大閘蟹，內地特產嚟o架，話你哋唔識食至真！」有見及此，少膽虫馬上身先事卒食先，動手開蟹蓋，隨即肥豪走音尖叫：「頂！好大陣味！」
一陣腥臭味傳入各人的鼻裏，少膽虫忍受不住話：「腦細，咁臭嘅蟹，點食呀？」「名副其實─正一臭蟹！」肥豪附和。淫賤黎頓時神色不悅：「啲蟹喺河飼養，呢啲係鮮甜腥味！」淫賤黎夾硬打圓場，少膽虫同肥豪無奈向現實與權力低頭，心知「呢鋪我哋真係被人河蟹喇！」
