城中鏡：阿Paul賀母大壽冇聽政改
政改諮詢前日正式啟動，政務司司長林鄭月娥親自領軍到立法會宣讀諮詢文件，但唔係每個議員都會坐定定聽佢講嘢，好似行蹤飄忽嘅阿Paul謝偉俊就全日冇現身，直至夜晚九點先趕返立會開會。因乜原因咁大膽連政改都唔聽？原來佢係為咗飛去美國同母親大人慶祝八十大壽。
謝偉俊（後右一）早前赴美幫母親（前中）擺大壽。（受訪者提供）
其實阿Paul八十年代尾曾舉家移居美國，但之後回流香港發展，但佢所有屋企人就留喺美國，所以久唔久都會飛返美國探親，咁啱近日係佢母親八十歲大壽，為做孝順仔，點都要飛返美國新澤西州賀壽，亦順便同定居美國嘅屋企人團聚，提早過溫馨聖誕節。佢話今次赴美亦特登去爸爸墓地拜祭，而且今次行程計劃咗好耐，唔係專登避開政改，叫大家唔使咁多猜測喎！
