城中鏡：贊助好市民獎 袁莎妮抓頭
警方每年都會向一啲見義勇為嘅小市民頒發好市民獎，但原來呢個獎一直係由香港總商會贊助，而且早喺一九七三年就開始頒發。今年踏入四十周年，總商會計劃大搞慶祝吓，包括搵番七三年首次獲獎嘅其中一名六歲小朋友出嚟，講吓獲獎感受。不過，事隔四十年，呢位現年四十六歲嘅好市民，負責甄選得獎者嘅警察公共關係科，亦已同佢失去聯絡。
袁莎妮話佢都唔清楚總商會贊助好市民獎嘅由來，但四十周年一定要慶祝吓！（受訪者提供）
好市民獎四十周年慶祝儀式將於本月十九日舉行。總商會行政總裁袁莎妮話佢哋翻箱倒籠，都搵唔番當年點解會搞呢個獎，亦唔知點解會由總商會贊助，估計係當年香港治安麻麻，促成警方同當年嘅總商會高層合作搞番個好市民獎。雖然最後都搵唔番七三年嗰位好市民，但就搵到三位多年前嘅得獎者，向佢哋再頒發多個「別具意義獎」。
好市民獎每年約有四十名得獎者，其中一人會獲頒發大獎，過往獎金分別為二千元及三千元。為慶祝四十歲生日，今年起普通獎同大獎嘅獎金，將分別加碼至三千元及四千元，金額唔算好高，但勝在有意義。
