政壇：搞搞政：提特權法玩突襲 阿毛阻住地球轉
雖然政府官員已先後多次為免費電視發牌解畫，但偏偏公文袋「阿毛」毛孟靜就接力「炒冷飯」，前晚喺立法會動議引用《立法會（權力及特權）條例》，傳召港視主席王維基同通訊事務管理局主席何沛謙，由於類似動議辯論已係第四次，真係乜都講晒。
設計圖片
前晚嘅會議直踩至凌晨十二點，唔少建制派議員都不敵睡魔召喚，早喺晚上十點左右已較腳鬆人。有建制派透露，平時負責箍實建制派票嘅葉國謙，前晚都唔見影，工聯會惟有捱義氣睇檔兼「拉布」，黃國健同麥美娟喺臨近凌晨十二點時仲要求響鐘「點人數」，就係擔心泛民趁建制派人少少玩突襲，乘機投票表決通過引用特權法查免費電視發牌事件。
問蘇錦樑有冇食偉哥
有工聯會中人話成晚都擔心建制派唔夠人，所以先出奇招點人數，就算人數不足而流會，都唔使驚被泛民偷襲成功表決議案。前晚全靠工聯會「拉布」，到凌晨十二點前先唔使表決。呢場仗打到尋日下晝，阿毛個動議最終當然被否決啦，簡直係阻住地球轉。
話說喺佢發言期間，突然質問商務及經濟發展局局長蘇錦樑有冇食「偉哥」，令唔少議員當場嘩然。其實阿毛經常以高教育水平自居，依家講埋晒呢啲嘢，算唔算自打嘴巴呢？
