政壇：林鄭踩入元朗冧番鄉紳
新界鄉議局主席劉皇發前日喺立法會，提出反對將西貢大浪西灣納入郊野公園嘅修訂動議時，發言批政府拳拳到肉，但動議最後都被否決，一班受影響嘅鄉紳有幾火滾、同政府關係有幾差，大家心裏有數喇。
林鄭月娥（箭嘴示）到鄉議局元朗區中學畢業禮冧鄉紳，逗留咗近三個鐘先至離開。
不過，收到風政務司司長林鄭月娥尋日早上十點半鐘，就乘坐其司長座駕到達鄉議局元朗區中學，出席該校畢業兼頒獎禮。直至中午時分，林鄭隨該校校董會主席發叔、校董八鄉鄉委會主席曾憲強、十八鄉鄉委會主席梁福元及校長同教師，到地下禮堂食盆菜，直至下午一點幾鐘先至離開，足足逗留咗近三個鐘，認真畀面。
據聞林鄭喺畢業禮上除勉勵畢業生外，仲趁機推銷政改諮詢內容。不過，聞說政制及內地事務局局長譚志源都係呢間中學嘅校友，但點解校方唔請譚志源主禮，反而要請林鄭呢？林鄭前日一改過去斬釘截鐵話唔選特首嘅口脗，今次佢入元朗冧掂班鄉紳，莫非為將來參選特首鋪路？講開又講，鄉議局尋日傍晚見特首梁振英，表達對施政報告嘅意見，但發叔以開立會為由，改派副主席張學明帶隊。其實立會喺特首辦隔籬啫，真係行開一陣都唔得？定係唔想見特首呢？
