港人焗往是非地 紅色警示為底遲

既然泰國一片亂局，理論上梗係避之則吉，弊在現實唔到你揀。嗱，曼谷淪為血腥戰場之後，港府尋日下午終於將外遊警示級別由黃色提升至紅色，意思即係如非必要，避免前往。對報團市民來講，提升外遊警示嘅意義唔止係溫馨提示，更加係保障荷包，一般而言，紅色級別下團友可以保留團費半年、轉團甚至退款，而黃色級別則另當別論。所以咯喎，尋日上午啟程嘅團友根本冇得揀，一係提心吊膽焗住上機，一係抱住破財擋災嘅心態放棄行程，結果好多團友寧願冒險，都唔想浪費金錢。

唉，旅遊尋開心，居然搞到愁眉苦臉繼續行程，真係既激氣，又無奈。太一叮惟有提醒大家，如果閣下正身在動盪泰國，務必提高警覺，留意自身安全，平平安安出發，完完整整歸來。如果你身處平安香港咯喎，咁就更無必要以身犯險，既然微笑之國變咗怒火之城，旅遊勝地變咗是非之地，何必陷自己於險境？又何必貼錢買難受喎？萬一幾年前港人被迫滯留曼谷機場事件重演，咁就唔係講玩咯！

泰國局勢緊張，太一叮另一個要提醒嘅係港府。喂，旅遊熱點打到砰砰嘭嘭，點解你哋仲好似瞌緊眼瞓o架。正如有團友投訴，曼谷前晚已經陷入失控，點解紅色警示拖到尋日下午至發出呢？當局有冇正常判斷能力？講句唔好聽，泰國爆發血腥暴力示威，除咗嗰啲唯恐天下不亂、想去觀摩「學習」嘅「佔中」政客搞手之外，仲有幾多人夠膽搵命博吖！

前車可鑑，旅遊地區爆發動亂，港產官僚反應遲鈍隨時會累人累物o架。幾年前泰國又係發生示威騷亂，國際機場癱瘓，其他地區政府紛紛派包機接載人民回家，點知港府呆若木雞，後知後覺，結果幾百名歸心似箭嘅港人被迫滯留機場，有如國際孤兒，更有港人魂斷異鄉，血的教訓深刻，點可以咁快就忘記吖。

咁講啦，君子不立危牆之下，大前提都要知道幅牆有危險至得o架。旅遊警示嘅作用就似提醒危牆所在嘅告示牌，絕對唔可以馬虎o架。點講都好，太一叮祝願身處泰國嘅港人平安，今次旅程係咪樂不思蜀唔緊要，最緊要樂可歸蜀！