城中鏡：邱華瑋曾跟泰迪羅賓打Band
花名係「老虎仔」嘅遠東發展主席邱達昌，尋日拉埋孻仔Andrew邱華瑋出嚟，話要畀佢學吓嘢，唔好睇Andrew得二十四歲，原來已有八年工作經驗，仲已經「轉過行」，由跟泰迪羅賓學打Band，變成阿爸口中嘅地產佬。
泰迪羅賓原來係邱華瑋師傅。（資料圖片）
邱華瑋雖然鍾意作曲打Band，最終都聽爸爸意見入咗遠東發展。（資料圖片）
Andrew外貌黑黑實實，睇落幾捱得，佢自爆十六歲已喺馬來西亞學做建築、地產，○八年正式做嘢，唔知係咪喺馬拉做咗兩年工，曬到咁黑。點解忽然返香港捱世界？佢話係阿爺邱德根嘅意思，阿爺有日話：「你老竇成日黐住我，你都應該黐住老竇」。
Andrew鍾意作曲打Band，跟過泰迪羅賓學打Band，既然老竇想佢入行，加上自己覺得作為創作人，唔想成日唱同一首歌，但偏偏啲人最想聽你最紅嗰隻，衡量之下，就入咗遠東發展，做業務發展經理，依家由入標買地開始學起，早排遠展入標嘅美利大廈酒店項目，佢有份參與，仲爆料話出價三十五億，高市場預測嘅上限，但就唔夠海港企業勇。
