小店布置色彩繽紛，搶眼到極。
基本法委員會副主任梁愛詩一向予人嚴肅、不苟言笑感覺，原來詩姐都有童真一面。有本事將「冰山」劈開嘅，原來係老少咸宜嘅聖誕公仔。
詩姐被五花八門嘅聖誕禮品吸引，駐足觀看。
一身唐裝打扮包到密密實實，胸前再掛個證件套嘅詩姐，早前同友人齊逛中環置地廣場，商場內促銷貨品五花八門，但詩姐對減價時裝或手袋冇乜興趣，直至行經一個專賣聖誕裝飾專櫃，忍唔住駐足觀看。
小店布置色彩繽紛，有半個人咁高嘅聖誕小鹿、企鵝公仔、Q版雪人、趣怪聖誕襪、手袋，仲有原子筆、糖果等，款款造型夠卡通，搶眼到極。連詩姐嘅眼球都被吸引，露出童真嘅笑容，佢愈睇愈開心。店員見狀熱情地上前講解一番，當詩姐聽見原來係「願望成真基金」舉辦一年一度名為「分享願望的喜樂」慈善義賣活動，更加露出欣賞的眼神，笑瞇瞇聽店員解釋義賣詳情。不過詩姐花多眼亂，一時間唔知買乜好，睇完一輪後，佢空手離開，再同等候嘅友人道別，獨自返回中環辦公室。
應承再嚟幫襯
詩姐齋睇唔買，莫非冇帶銀包？非也，店員話，佢主動問義賣專櫃擺到幾時，當知道限期至Boxing Day即係本月二十六號，佢笑言遲啲會再來細心挑選。講番「願望成真基金」，宗旨係幫助患重病的兒童實現願望，十分有意義，難怪詩姐咁buy啦。
第一手消息請下載on.cc東網
