「佔領中環」三名發起人戴耀廷、陳健民同朱耀明今年三月開記者會，正式啟動呢個運動，六月搞第一次商討日嗰時，「快必」譚得志就聯同十幾個網民用「夾實佔中 堅搞普選」名義請願，話要爭取一個「符合國際標準嘅普選方案」。之後佢哋原班人馬喺十月搞咗個「佔中後援會」起動大會，當日仲有人民力量立法會議員陳志全出席。佢哋唔止喺網上發表意見、各區擺街站籌款，上月底仲講明，若果冇公民提名，元旦就會佔中，仲搞咗「元旦佔中後援會」。
「佔中」發起人陳健民上星期去信人力要求澄清，點知人力回覆話「佔中後援會」唔屬於佢哋，所以「佔中」就發聲明，費事有人混淆。陳健民又話，若果有組織希望用「佔中」「後援會」呢啲名，最好就用自己組織個名，好似「民主黨佔中後援會」，同埋先問問佢哋，以資識別咁話。陳健民強調，佢哋唔會喺元旦佔中，又唔認為公民提名係唯一符合國際標準嘅方案，同埋只有民主發展網絡嘅籌款戶口。
其實公文袋副主席陳淑莊八月都發起「佔中運動後援會」，幫手做宣傳籌款工作，普通市民搞唔清楚都好正常。陳健民就話已同陳淑莊傾掂，改為加入佔中屬下嘅工作小組，呢個後援會已經冇咗喇。
嘩！佔中未搞就係咁畀人抽水，認真唔掂，淨係撲火都夠晒忙。快必尋晚喺社交網站冷靜回應，話籌得嘅錢全用在街站所出，街站係為佔中召喚一萬義士等，總之涓滴歸公。但佢最後反問，借機搬弄是非者是否毫無着力處？他們是否枉稱熱血？唔知話邊個枉稱熱血呢？乜都未做，就開始內訌？
第一手消息請下載on.cc東網
