政壇：立會領事宴夏千福淪配角

立法會主席曾鈺成尋日按慣例宴請各國駐港新任領事出席交流午宴，相當「惹火」嘅美國駐港總領事夏千福，亦因新官上任獲邀。不過，各國政要聚首一堂，講嘅並唔係乜嘢國家大事，而係飲飲食食同幫仔女撲學位。夏千福同曾鈺成唔同枱，只能做個大配角。

夏千福尋日去立法會食午飯，無講政改。

夏千福尋日現身立會宴會廳，同場嘅仲有二十幾個國家嘅總領事。夏千福未有同曾鈺成同坐「主家席」，改由張宇人同李慧琼「陪坐」。原來張宇人同夏千福都喺美國連鎖快餐店做過，佢哋都係炸薯條出身，張宇人笑言，當年大家都係趁升大學前嘅暑假搵外快，但佢「入行」仲早過夏千福八年。

坐埋同一圍嘅議員都表示，印尼同埋德國領事都不約而同呻國際學校學位難求，要求議員幫手諗諗計，仲話搵日再約出嚟慢慢傾。