被問到人口政策諮詢，聶德權係咁背文件。
官場音樂椅又再轉動，尋晚傳出新聞處處長黃緯倫將會調去海事處，接替明年二月退休嘅海事處處長廖漢波。政務官空降積習深重嘅海事處，真係祝佢好運嘞。但消息就話，離廖漢波離職仲有幾個月，依家好難講實佢真係調去海事處。
又有消息話南區區議員馮煒光做新聞統籌專員應該無走雞，遲啲就會公布，而政務司司長辦公室專員聶德權，幫手做完人口政策諮詢後，遲啲就會接替黃緯倫做新聞處處長。不過，做得新聞處處長可能都唔方便放料，聶德權尋日出席青協網台嘅錄影節目都好口密，講嘢謹慎到有啲悶悶地。
點解？問佢對做新聞處處長準備成點，佢話等公布，問佢預計可唔可以同馮煒光合作愉快，佢封口唔講，問佢人口政策，佢就背書講番諮詢文件嘅內容。節目中有青年問佢點教小朋友，點知佢話年輕人掌握學習技巧同有良好EQ（情緒智商）好重要等，再講番政府推行資歷架構鼓勵終生學習，都係悶爆。
第一手消息請下載on.cc東網
