食物及衞生局局長高永文尋日朝早出席政府化驗所嘅活動時未見病態，點知一個幾鐘後去到立法會衞生事務委員會特別會議時，就不停用紙巾抹鼻水。根據記者非正式統計，抹鼻次數最少有五次，連講嘢把聲都好磁性。唔知佢係咪呢排忙於為肺炎球菌疫苗計劃解畫，忽略咗自己嘅健康呢？

不過，議員Ann蔣麗芸見狀，即刻一副關心口脗：「一個人病最緊要休息，睇你病到咁嘅樣，係咪應考慮休息吓，或者麻煩你打疫苗啦。」即時引嚟議會內唔少笑聲。高局長聽到咁惟有尷尬多謝佢關心。

講番個肺炎球菌疫苗計劃，阿Ann發問時又再失禮人前，問局長點分疫苗「乜價」，細路仔應打十三價定二十三價？其實只要阿Ann留心啲聽，就會知道張超雄早佢二十分鐘前已問咗同一條問題囉，或者新聞呢排都好多報道啦，衞生防護中心總監梁挺雄同局長都不厭其煩，答得好詳細。

第一手消息請下載on.cc東網iPhone/iPad/Android/Windows Phone Apps