中央政策組喺舊年底決定收回原由研究資助局審批、每年共有二千萬元公共研究資助計劃，改由中策組自行審批同監察。首批公共政策研究資助計劃撥款審批尋日公布結果，本身唔係大學嘅大舜政策研究中心榜上有名。

中策組喺舊年宣布接受來年計劃申請時，重申會確保學術自由同研究項目質素，又破天荒引入由十名學者組成嘅評審委員會，仲邀請到港大社會工作及社會行政學系名譽教授周永新擔任主席，以平息外界疑慮。

今年七月，中策組就香港長遠發展同各社會課題嘅研究需要，定出包括土地及房屋、扶貧及安老、政制及管治、體外經濟、環境保護等七大重點議題，申請者亦可以自行提出其他研究範疇，供評審委員會同中策組考慮。而為咗令計劃更具靈活同彈性，中策組亦會不時按研究需要，邀請個別團體進行特定議題。

25萬做十個月研究

經過四個多月，中策組尋日終於公布本年度首批公共政策研究資助計劃撥款審批結果。是次批出二十個研究項目申請，總資助金額達八百多萬元。獲資助嘅除咗有多間大專院校外，仲有民間研究中心上榜，佢就係由前議員何鍾泰、劉秀成等人組成嘅大舜政策研究中心。大舜政策研究中心將為「老年友好房屋政策」呢個議題進行為期十個月嘅研究，資助金額為二十五萬元。

大舜政策研究中心首次獲得政府資助進行政策研究，簡直好似冷手執咗個熱煎堆咁，應該好開心至啱，但首席研究員之一嘅劉秀成喺接受查詢時似乎對獲資助項目詳情一無所知，淨係話中心一共遞交咗幾個申請，之後都有獲政府邀請參與面試講解研究計劃詳情，但其他嘢就唔係太清楚。如果劉秀成連計劃研究範圍都唔清楚，試問政府又敢唔敢用佢哋嘅研究結果呢？

第一手消息請下載on.cc東網iPhone/iPad/Android/Windows Phone Apps