前朝衰官齊獻醜 貪曾落鑊亦不遠

喺呢個象徵吏治敗壞嘅「噩夢鐵三角」之中，貪湯都算最禮義廉咯，出任廉政專員期間假公濟私、貪威識食、揮霍公帑，一手摧毀香港嘅廉潔招牌，結果遭立法會帳目委員會發表報告「痛斥」。哈，呢隻醉貓居然唔知醜喎，仲駁嘴明知故問違咗乜嘢規喎，你話係咪無賴中嘅極品吖。所以咯喎，尋日一個公開論壇上，有廉署前主管對貪湯深惡痛絕，炮轟佢嘅行為係「厚顏無恥」！

前廉政專員不知廉恥，兩位前政務司司長亦唔好得幾多。唐唐九龍塘豪宅「掘深咗」僭建「地下王宮」，本已「英」名盡喪，點知仲要老婆承擔僭建罪名，被判罰款十一萬元，成為近十年同類案件中最重嘅判罰。至於許仕仁，境況更加不堪，唔止涉及貪污指控，仲要潦倒到債台高築，最終因無力償還巨債而被高院頒令破產。三個「曾朋友」，三件大醜聞，各有各嘅醜陋，各有各嘅齷齪，但有一個共通點，就係全部衰喺一個貪字。

對於前朝高官接二連三獻醜，市民點睇呢？「東方報業民意調查」顯示，四成五受訪者指影響政府管治威信；兩成五斥腐敗風氣猖獗；兩成四更認為以上醜聞只係前朝貪腐嘅冰山一角。受訪者亦對醜聞三男子齊聲狠批，其中三成三人指唐英年知法犯法，肆無忌憚；三成二斥前朝政府亂象叢生。

嗱，問題就喺呢度嘞，點解官場會極速墮落呢？點解高官腐敗成風呢？歸根究柢，咪就係貪曾遺禍囉。上樑不正下樑歪，貪曾被東方踢爆在任期間「貪遍省港澳、歎盡海陸空」，港府阿一都係貪腐分子，高官點會唔有恃無恐吖？貪曾唔止自己貪，仲帶挈縱容下面嘅人貪，有咗呢把「曾系」保護傘，官場唔腐敗至奇啦。

咁就難怪，大部分受訪者直斥貪曾其身不正，禍港七年。對廉署調查貪曾貪腐案查到冇咗下文，四成人直斥廉署拖延調查，有違公義及法治；三成促廉署盡快追究貪曾；兩成四直指廉署未能顯示反腐決心。

打蛇七寸，除惡務盡，計太一叮話齋，當局要撥亂反正，要維護本港廉潔核心價值，就絕對唔能夠放過貪曾，事關貪腐大老虎逍遙法外，打再多烏蠅都係嘥氣嘅咋。不過咁，天網恢恢，疏而不漏，醜聞三男子已經「一鑊熟」，睇嚟貪曾落鑊都唔遠咯，到時佢哋就可以夠腳開枱喇，叮！