SUN搞作：網絡小說：獅子山典範
「真係好多謝金總裁接受我哋嘅訪問，金總裁百忙之中都肯抽空，小記真係萬分感謝！」
「哎，講呢啲！出少次海啫！」
「咁客氣說話就唔講喇。眾所久知，金總裁靠自己努力拼搏，由低做起，成功將金鎖匙企業分拆上市再分拆上市，凡事親力親為，對人友善，照顧朋友，愛錫動物，操行良好，十項全能，會考仲30分添！咁我哋有好多年輕讀者可能仲處於事業起步階段，有啲迷茫，都好想請教一下，當年你畢業之後係點樣摸索出成功之路呢？」
「我嗰陣讀完牛佛大學都好迷茫，一個人走咗去杜拜流浪，後來喺摩納哥賭到好迷失。終於，我喺馬爾代夫做緊spa嘅時候突然領悟，係時候要返香港做啲嘢。」
「咁請問你嗰陣做啲咩呢？」
「創業。我見好多大學生一畢業就失業，就搵佢哋幫手做嘢，譬如大家成日見嘅汽水機，其實就係搵啲大學生喺入面收錢，數吓啱唔啱，找錢，再拎汽水畀你；複雜啲嘅有影印機，入面嘅人要好快手將啲字抄一次再隊出嚟，都幾考工夫，加上工作環境好細好焗，無咩人願做。但係我敢！」
「於是就一舉成功，創立依家嘅金鎖匙企業？」
「哦，哦，唔係。後來發現創業太難喇，我決定放棄。金鎖匙係我阿爺留畀我嘅。」
