郭炳江（前右一）、郭炳聯（前左二）同新地一眾高層主持開步禮。
新鴻基地產尋日喺全港最高建築物環球貿易廣場舉辦垂直馬拉松慈善賽，超過一千位運動愛好者報名參加呢項跑二千一百多級樓梯嘅賽事。大會邀請到財爺鬍鬚曾、新鴻基地產主席兼董事總經理郭炳江同郭炳聯兩兄弟到場主持開幕禮。郭炳聯話自己平日少行樓梯減肥，原因並唔係行樓梯太辛苦，而係佢嘅辦公室位處四十五樓，如果真係要行，分分鐘要行半日。
郭炳聯（右）興奮地抱住首位完成賽事嘅女參加者。
大批健兒比賽前來個大合照。
郭炳聯（左起）、鬍鬚曾同郭炳江主持垂直馬拉松慈善賽開幕禮。
鬍鬚曾一級都無行即閃
郭炳聯話平日都有做運動嘅習慣，但就以行山游水居多，有時都會行吓樓梯減肥，主要目的係想減走個大肚腩。位於灣仔嘅新鴻基中心樓高五十三層，佢嘅辦公室就喺四十五樓，話平日都有諗過爬樓梯返工，但就因為寫字樓樓層太高而打消念頭，改為日日搭升降機算數。佢又誇下海口話如自己嘅寫字樓搬去十樓或更低樓層，佢一定會行樓梯返工喎！
雖然鬍鬚曾喺主持起步禮後一級樓梯都無行過就走人，但郭炳聯透露鬍鬚曾朝早六點幾已起身做運動，每個星期六仲會去母校香港喇沙書院玩劍擊，運動量非常充足。佢又話兩人喺台上之所以不斷竊竊私語，並唔係討論緊樓市辣招，而係鬍鬚曾向佢傳授健康秘訣，叫佢每日堅持早睡早起做運動，同埋千祈唔好因食得太多嘢而搞到成個肚腩凸咗出嚟。
問到地產商近期採取措施，賣樓時為買家抵銷辣招開支，郭炳聯話地產商都係想薄利多銷。佢又話中國嘅市場龐大，香港可以睇作為十三億中國人嘅金融中心，所以睇好香港樓市前景。
第一手消息請下載on.cc東網
