蔡海偉
香港社會工作者聯會早前已公布過喺社聯工作咗二十一年嘅蔡海偉，將會接替方敏生出任社聯嘅行政總裁，尋日蔡海偉正式履新，坐正做CEO。雖然尋日係星期日，但蔡海偉都冇時停，又要出席活動做主禮嘉賓，又要同來自台灣嘅社企創辦人交流。
蔡海偉尋日去咗九龍公園出席由社聯同香港復康聯會籌辦嘅國際復康日活動，個活動除咗嘉許一啲聘請殘疾人士嘅僱主外，仲有殘疾人士表演。佢就趁機會同一班殘疾人士傾下偈，了解下佢哋嘅需要。除咗出席活動之外，佢仲同三位嚟香港參加社企民間高峰會嘅台灣社企創辦人見面，交流一下，可以話成日都冇停過。
不過，佢話好多人知佢履新都走埋嚟恭喜佢，令佢非常開心。咁多人支持社聯，佢仲同自己講一定要做好呢份工，嚟緊佢亦打算同傳媒朋友聚會，講下未來大計咁話。
第一手消息請下載on.cc東網
