梁智仁（左二）實地視察北大嶼山醫院。
接替胡定旭做醫院管理局主席嘅梁智仁教授尋日履新，專登揀咗間同佢一樣咁「新」嘅北大嶼山醫院視察。佢遊咗成個上晝，對北大嶼山醫院讚不絕口，猛話醫院嘅設備、環境都比其他公院好。
眾所周知，去公立醫院睇急症隨時「等餐懵」，床位亦好擠迫，唔少病人要被迫瞓走廊。梁智仁特登針對性話會改善公院嘅輪候時間，包括穩定醫生流失率嘅問題，短期內安排培訓、升級，挽留有經驗嘅醫生，又話長遠嚟講，隨住兩間大學嘅醫科學額增加，唔夠人手嘅問題將會慢慢解決。佢仲話要改善床位擠迫嘅問題，等啲病人唔好咁辛苦喎！跟住佢又講到明上任後會從病人同家屬角度解決問題，希望以後唔好再煩到市民咁話。但要唔好再煩到市民，係咪咁容易呢？
除咗改善問題，佢仲分享咗未來大計，希望可以繼續提供多啲訓練畀醫生，令佢哋可以全面地提供世界級嘅服務予市民。喺學術方面，佢亦想有多啲創新嘅臨床研究誕生。至於下星期食物及衞生局督導委員會將舉行第二次檢討醫管局運作，佢就話相當重視呢個會議，希望從中得到更多寶貴意見。
不過，北大嶼山醫院人手相當不足，急症室每日只係開八個鐘，區內唔少市民鬧爆，去到出年第三季醫院先會有二十四小時服務。佢就笑晒口話好欣賞醫院嘅硬件設備。如果佢代入區內居民嘅角度，唔知佢仲笑唔笑得出呢？
第一手消息請下載on.cc東網
