政壇：何秀蘭反拍烏龍示威者
「城市論壇」每個禮拜開壇，都吸引各路人士表達意見，好似尋日討論「貪湯」前廉政專員湯顯明嘅貪腐案，台上嘅嘉賓講者鬧爆貪湯嘅醜行，現場仲見到愛港之聲前核心成員、原名陳廣文嘅傅振中亦帶齊道具標語喺台下，但佢嘅目標唔係貪湯，而係趁廣告時間，一個箭步衝上工黨立法會議員Cyd何秀蘭面前，舉牌抗議公文袋喺過去多宗司法覆核案中，都由大狀黨員出手擔任代表律師，有包攬訴訟之嫌。
傅振中（左）向何秀蘭（右）舉牌，何秀蘭即刻舉機影番佢。
據我哋所知，阿Cyd未過檔公文袋，但難得阿Cyd見慣大場面，面對傅振中摸錯門不但冇嚇親，仲反客為主，用手機影番傅振中轉頭，笑笑口好似睇表演咁開心。傅振中亦唔介意阿Cyd當佢冇到，話最緊要有表達意見嘅權利喎！咁又係，大家各取所需，使咩動氣？
