撐住拐杖嘅張建東同太太尋日入馬場，佢話約咗朋友食飯喎！
相信大家都知道，機場管理局早前就機場北部土地用途內訌，引發機管局董事羅康瑞辭去該局轄下基建規劃委員會主席一職，羅康瑞仲開記者會，話機管局主席張建東嘅立場同行為令佢透不過氣。事隔十日有多，張建東尋日撐住拐杖喺沙田馬場現身，但就唔回應同羅康瑞不咬弦嘅事。
張建東喺六年前曾患急性血癌，至今已全面康復，亦繼續出任多個重要公職，包括機管局主席。佢尋日撐住拐杖現身沙田馬場，雖然有太太陪伴，但仍然顯得悶悶不樂，記者問佢同羅康瑞之間嘅爭拗，佢都無回應。佢只係話約咗朋友食飯，所以篤住拐杖都要入場奉陪。至於點解要借助拐杖行路，佢就笑笑口話整親。有傳張建東早前接受髖關節置換手術，可能至今仍要撐杖而行，希望佢早日康復啦！
羅康瑞開記者會後，張建東一直無回應，但運輸及房屋局局長張炳良即晚回應事件，立場好明顯同羅康瑞較為相近。
第一手消息請下載on.cc東網
