政府搵地起屋愈嚟愈難，喺市區建屋被批評違反規劃原則，發展新界土地亦惹起滅村爭議，又被人批評賠償太少，為咗安撫被迫遷嘅居民，發展局決定出動「銀彈政策」，將特惠補償加碼，「波波」陳茂波尋日特別喺局長網誌力銷新方案，包括擴大申領特惠津貼嘅資格，又提高津貼金額由三十六個月租值，大增一倍到七十二個月等等，似為日後陸續有來嘅發展計劃鋪路。咦！唔通真係雞髀打人牙骹軟？屆時新界東北收地會收得順利啲？

設計圖片及對白

東北發展用緊銀彈政策

波波尋日再喺網上平台發功，提及新市鎮發展工程，話近年社會上有意見覺得依家嘅特惠津貼同安置安排唔能夠完全顧及受影響人士，所以決定檢討過時嘅補償方案，例如以前只有寮屋同牌照屋嘅持牌人先可以攞到特惠津貼，新方案之下，只要喺清拆前登記咗又連續住夠十年或者以上嘅人都可以攞到津貼，津貼金額亦都大幅提高到七十二個月嘅租值，上限係六十萬蚊，之不過，實質攞到幾多津貼就可能按居住年期而有所唔同。

舊政策又規定只有住喺住用構築物嘅佔用人先可以攞到搬遷津貼，新方案就優惠埋住响非住用構築物嘅人，只要佢哋住夠兩年都可以攞到。領取商舖、倉庫及船排等特惠津貼嘅資格亦會放寬，津貼金額亦都由以前四到十二個月租值，增加到七至十五個月租值。新界居民好重視嘅習俗亦有顧及，例如遷移墳墓、金塔同神龕嘅特惠津貼都會改善。

波波話，呢個新方案如果獲立法會財務委員會審議通過，就會適用喺今年七月十五號已經做緊或者之後開展、受工務工程影響嘅合資格人士，不過，因為新界東北新發展區已經有特設嘅特惠津貼，呢個計劃就唔啱用啦。因為，政府喺對東北發展嘅賠償方面，都已經係用緊銀彈政策囉！

第一手消息請下載on.cc東網iPhone/iPad/Android Apps