三日打錯七針 醫局鑊鑊都甘

件事係咁嘅。元朗容鳳書健康中心普通科門診上月廿六至廿八日期間，為七名成年病人注射破傷風疫苗（Tetavax），其後護士覆查紀錄，發現擺咗個大烏龍，診所為病人錯誤注射咗用於小童嘅四合一（白喉、破傷風、百日咳、小兒麻痹）混合疫苗（Tetraxim）。點解會咁烏龍？有醫生話喎，兩款疫苗外形唔同，但名稱相近，唔排除醫護睇漏眼搞錯咗。

嘩，仲有冇兒戲啲呀？打錯針唔講得笑o架，今次就話好彩冇引致嚴重後果啫，如果掉番轉幫小朋友接種大人疫苗，咁就大劑喇，你話點收科呢？

食物及衞生局局長高永文尋日仲死撐，話慶幸疫苗對病人冇嚴重副作用，疫苗內亦有足夠破傷風保護效力喎。不過佢亦不得不承認，發生一宗事故已經有問題，發生七宗係「非常不理想」，又指新界西聯網已經成立調查委員會查找事故原因，防止再發生同類事故咁話。

高永文就講得輕鬆咯，人命關天o架，咁離譜嘅醫療事故一宗都嫌多，三日打錯七針何止「不理想」，直頭係不可思議喇。好話唔好聽，萬一大吉利是搞出人命，呢隻鑊食衞局孭唔孭得起！

講到「查找事故原因，防止再發生同類事故」，更加不知所謂。如果高永文記憶力正常嘅話，應該知道今次已經唔係第一次打錯針，而係第N次嘅嘞，醫療高官次次都話要跟進同改善，結果次次都係得個講字，批評接受，烏龍照舊。

沒有最恐怖，只有更恐怖。近年公立醫院頻頻成為新聞話題，唔係因為服務點樣出色，而係因為事故不斷，唔係搞出人命就係累人傷殘。呢嗱，除咗打錯針，仲有派錯藥、開錯刀、切錯腳、刺錯肺、輸錯血，甚至將唔同血型嘅心臟移植喺病人身上，簡直五花八門，無奇不有。

最離譜就係，每次爆大鑊，當局例牌成立所謂專家小組調查，然後煞有介事提出一堆補鑊措施，但係從來冇人被問責。計太一叮話齋，呢類調查及補鑊措施根本冇意義，犯錯唔使懲罰不特止，仲可以加薪晉級，醫療事故有乜理由唔不斷重演，病人又點可能唔提心吊膽吖，叮！