SUN搞作：少膽虫手記：失敗的循序漸進
「賤虫，你係咪想敗咗我辛辛苦苦作番嚟嘅江山？」睡眼惺忪之際，頭上受了一下重擊，半睜開眼，淫賤黎企喺前面咬牙切齒，舉起拳頭，少膽虫即刻嚇到彈起，喺淫賤黎後面，原來仲企咗位膠蘇，一睇，就知佢不懷好意。
「腦細，你講啲咩？鄙人的心永遠向着《爛果》，我為咗你，連入水飯房都制！」少膽虫跪喺地下，扯住淫賤黎嘅褲管，扮晒獻出一顆真心，「死開啦！唔係膠蘇向我直諫，我都唔知你專橫成咁！」淫賤黎一踢，將褲管上的手揈開，叫少膽虫的心碎了！
「膠蘇嗰篇畀你抽起嘅傑作，每一個字都帶出咗資本主義底下嘅自由市場精神！」淫賤黎喺褲袋摷咗疊A4紙出嚟，讚嘆地道。
膠蘇喺後面扮晒熱血，迅速抽水：「腦腫，壹全霉雖然係一間大公司，但係我哋行緊兩種制度，黎黎當然係一號領軍啦，但係二號係自由、民主呀！我哋又何苦做太監自閹呢？」淫賤黎聽了，立即拍了拍膠蘇膊頭，道：「好！有為青年！」
見到就嚟失勢，少膽虫實在不甘心，駁道：「後生仔，識唔識咩叫循序漸進呀？」不消片刻，淫賤黎臉上變色，大叫：「講埋啲垃圾！」然後就如進擊的巨人，一下旋風拳就把少膽虫打往堆填區去。
