SUN搞作：網絡小說：曾系獻世寓言（下）
貪曾畀貓群攻擊到仆喺街，於是只能慢慢躝去動物園另一園區。
躝吓躝吓，已是正午，烈日當空，貪曾只覺唇乾舌燥。意識漸漸朦朧，眼前到底係太陽炫光，定係上帝急call，貪曾已經分唔清楚。佢心中暗禱，如果依家有水飲，佢返去一定會開半支私吞茅台獻畀上帝。「咁孤寒o架你！要獻就獻一打！」貪曾彷彿聽見上帝同佢講價，只好話：「半打啦，好無？」
「成交！」話口未完，貪曾登時覺得一股清泉灌入喉中，全身舒泰，意識回復過嚟。但係當佢醒後第一眼見到嘅，竟係一條搖呀搖呀嘅母狗尾，隻狗更擰過頭來，對住貪曾微笑。
貪曾執番條命就謝天謝地，已經唔想再追究剛才飲嘅係何種瓊漿玉液，淨係留意到置身嘅狗園中，竟然又係選大佬嘅時候。「唉！」貪曾慨嘆一聲，「我唔做大佬喇！唔係因為扮大佬，我都唔會搞成咁！」
貪曾轉身離去，褲腳卻被狗狗們輕輕咬扯，似乎要帶佢去邊咁。貪曾深深呼吸一下，心諗：「果然係人類最好嘅朋友！比起無情嘅龜同埋善變嘅貓，狗果然係最忠心！」貪曾於是跟住狗狗們帶領，沿途接受狗狗們夾道歡迎，心中大喜。終於，貪曾被領到一間狗屋前，門口寫住「衙門」，門內是一張公案同大靠椅。
狗群圍在門口汪汪高呼，似乎簇擁貪曾坐上去。「哈，咁好死嘅？竟然畀我做大佬、仲畀埋個官我做？」貪曾暗喜，笑吟吟咁坐落去，狗狗們見狀，全部都瘋狂大笑。
貪曾察覺異常，進入沉思：「等陣先，咁我咪係……」
（完）
