SUN奇古怪：SUN潮語：【土 豪】
潮語「土豪」就係指一啲新界原居民或鄉紳，因為太公剩落好多土地，以前不嬲用啲地嚟種菜養魚，後來政府發展新市鎮，不斷喺新界徵地建屋，於是呢班鄉紳或原居民後代就無端端發咗達，成為咗富豪。直到今日，呢幫「土豪」依然舉足輕重，對新界事務有好大嘅話事權，佢哋嘅影響力甚至已經殺出新界，「土豪」霸氣直指中環！
近日喺新界土地問題接連爆出唔少風波，丁權亦再次成為熱門話題，新界鄉紳成為眾矢之的，有人甚至稱佢哋為「土豪」！據聞，將會有一齣新嘅港產電影，係會以「土豪」為主題，電影海報中各位主角嘅造型，甚似現實中喺新界地區甚有勢力嘅人士，一時之間令「土豪」呢個稱呼變成潮語！
「土豪」呢個名詞已經有相當悠久嘅歷史，仲曾經喺中國古典歷史小說中出現過好多次。當年毛澤東喺未打贏國民黨一統江山之前，因其農民出身同支持者多數都係貧苦農民，以至毛主席都被人稱為「土豪」。到咗二十一世紀嘅今日，喺香港地「土豪」就有一啲唔同嘅定義。
「土豪」無論從打扮到說話風格，都不失嚟自鄉間嗰種土味。嗰種「土」並唔係老土，而係鄉土。何如某鄉事委員嗰個獨特嘅髮型，同佢十足村長一樣嘅講嘢態度，真係可謂「土豪」之中嘅代表。
如果一個人豪邁奔放，極具霸氣，甚至有村長一樣嘅威風，都可以被稱作「土豪」，如果加上「土豪Look」，就更加潮！唔信可以試吓，不過畀人打就唔關我事。
