政壇：搞搞政：睇唔到人唔愛國 李漢奸又發噏風
港府即將展開首階段政改諮詢，又係「搞事四人幫」出動攪局嘅時候喇！早兩日先有「民主阿婆」前政務司司長陳方安生見記者，對政改問題說三道四。尋日輪到「李漢奸」民主黨創黨主席李柱銘接受港台電視部訪問接力瘋噏，佢聲言香港政界無一個「人」係對抗中央嘅，仲話已故中央領導人鄧小平心裏面嘅「一國兩制」，並唔係好似依家咁。李柱銘出名鍾意勾結外國勢力對抗中央，唔通佢當自己唔係人？唔怪得知佢唔使問米，都可以同鄧小平在天之靈溝通喇！
設計圖片
李漢奸喺訪問中指出，李飛話特首必須愛國愛港，不可同中央對抗，但係佢就睇唔到香港有任何政界人士，係唔愛國愛港同會與中央對抗嘅。對於建制派人士質疑泛民提議嘅「公民提名」，會架空咗獲《基本法》授權提名特首候選人嘅提名委員會，李漢奸就反問：「就算真係架空咗提委會，又有何不可呢？」咁講法唔通真係要發動武裝流血革命先至叫對抗？
李漢奸又話大部分港人都唔願意搞革命同坐監，如果唔想中央話乜就乜，可以選擇上吓街、流吓汗，「再唔係可以走（移民）」。對於中央多番警告英美等國唔好干預香港政改，李漢奸話中央愈唔想香港人做嘅，就愈要努力做。睇嚟好快佢又會周遊列國，再度聯同外部勢力唱衰香港。
