東網電視
更多新聞短片「玩具大王」蔡志明孻仔蔡加讚尋晚同女友汪圓圓拉埋天窗。蔡家第一次娶新抱，斥資逾千萬港元喺灣仔會展筵開一百六十席打造世紀婚禮，蔡志明喺政商界人面甚廣，喜宴上自然冠蓋雲集，港、澳特首梁振英及崔世安都係座上客！
梁振英伉儷（左一、二）到場祝賀。右一、二為蔡志明夫婦。
崔世安（左）特地由澳門「過大海」來港出席世紀婚禮。
前政務司司長唐英年夫婦（左一、二）同一對新人（右一、二）合照。
馬時亨夫婦亦有出席。
其他賓客有恒基地產主席李兆基、新世界發展主席鄭家純、利豐集團主席馮國經伉儷、前商務及經濟發展局局長馬時亨伉儷、港區全國人大代表霍震寰伉儷等，英皇集團主席楊受成伉儷就聯同賭王何鴻燊四太梁安琪及藝人謝賢齊齊去飲。
婚宴場地以童話式花園設計，極富歐陸色彩。太子珠寶鐘錶老闆鄧鉅明形容婚宴安排相當有心思，係近來少見嘅大場面，仲盛讚一對新人係鐘錶界嘅金童玉女，更祝二人早生貴子，皆因「生出嚟一定係靚仔靚女」，佢又話蔡家珠寶、鐘錶樣樣都有齊，送禮都係現金最實際。廣東社團總會主席王國強則形容尋晚名人空群而出，讚新老爺蔡志明交遊廣闊，王國強話佢都係以現金做「人情」。
第一手消息請下載on.cc東網
