政壇：陳振彬無懼泰內亂
泰國近日政局動盪，整個曼谷到處可見抗議、佔據政府辦公地點嘅情況，港人熱衷去泰國，因此商界、旅遊界都金睛火眼(目及)實泰國嘅情況，有啲人對曼谷連日立立亂嘅政局唔睇好，但喺泰國有設廠嘅觀塘區議會主席陳振彬（Bunny）就好淡定，仲估計今次呢場風波應該唔會好大件事，可能再過多三幾日就平息，似乎對泰國呢次內亂毫不擔心咁。
設計圖片及對白
料亂局難持續
泰國嘅混亂已經持續幾日，示威者嘅聲勢一直擴大，行動亦似有升級，繼早前截斷警察總部嘅電源之後，尋日更有幾千示威者闖入陸軍總部，要求軍方加入佢哋嘅行動，但暫時都未見軍方有異動。港府已經就外遊發出咗呼籲，旅遊界亦取消咗一啲近日赴當地嘅團，但呢場政治風暴一日未平息，各界都難以安心。對當地情況了解甚深嘅Bunny就話，雖然泰國嘅連場示威未平息，但軍方嘅姿態係呢類行動中重要嘅一環，以目前嘅趨勢嚟睇，軍方未見參與，故認為呢一波示威潮應該好快成為過去。
除咗軍方嘅態度外，佢都從泰國嘅政治全局去睇，認為泰國總理英祿係民選嘅國家首長，而且得到超過七成當地人民支持，喺咁嘅基礎上，民間嘅聲音始終要受到正視。換言之英祿政府應該冇乜大患。
聖誕假期好快就到，定過抬油嘅Bunny已經計劃同家人去新加坡，因為囝囝假期後要考試，所以提早放假免不了。去到新加坡又有咩計劃呢？Bunny就話一切交晒畀太太處理喎！
