預算年年計錯數 紓困勿再諗縮數
香江官場真係無奇不有，前廉政專員湯顯明居然淪為摧毀本港廉潔嘅貪腐分子，而財政司司長曾俊華更加係不斷計錯數嘅「史上最廢財爺」，簡直諷刺。嗱，有會計師行預測，本年度庫房會由預算案推算嘅四十九億元赤字，「轉虧為盈」錄得一百二十億元盈餘，令財政儲備增至七千四百五十九億元。簡單講，鬍鬚曾又計錯數！
年年預算，年年失算，鬍鬚曾計錯數早就唔係新聞咯，最離譜嗰次誤差近一千億元添，今次計錯一、二百億元，濕濕碎喇。太一叮最關心嘅係，既然庫房轉虧為盈，港府會點利用呢筆意外之財呢？你知啦，財政失算就話可以賴無心之失啫，如果庫房水浸都唔肯扶貧紓困，咁就想唔認係孤寒財主都唔得喇。尤其係當局早前至大鑼大鼓公布貧窮線，證實本港窮人多達一百三十一萬，若然依舊不顧民瘼，不恤民情，套用官老爺自己嘅說話，咁就真係自取其辱嘞。
預算案點樣扶貧紓困？本來，最實際梗係直接派錢喇。好似澳門咁，年年派錢，今年仲加碼至九千蚊添，人人有份，皆大歡喜。但可惜吖，人哋派錢派到官民同樂，香港唯一一次派錢就派到七國咁亂，笑話百出。見過鬼怕黑，港府仲邊敢冒險吖，派錢唔使諗o架嘞，但願港產官僚生生性性，紓困措施周詳啲，最緊要雨露均沾，唔好又甩甩漏漏，顧此失彼，搞出一大群受惠唔到嘅「N無」人士吖。
當然啦，香港經濟表面風光，暗裏陰乾，港府嘅紓困對象唔應該只係貧困一族o架。日前有調查顯示，處於夾心階層嘅中產家庭一樣經濟擔子沉重，而且交稅有份，福利冇份，生活壓力唔會比綜援戶好得幾多嘅咋。鬍鬚曾自認「中產」，雖然畀人鬧係「何不食肉糜」嘅翻版，不過在公在私係咪應該向中產人士伸出援手呢？講句唔好聽，善用財政盈餘扶貧紓困，其實亦係幫自己提高民望咋，何樂而不為。
咁講啦，扶貧紓困，港府責無旁貸。學惡導遊話齋，前世債，今日還，前特首曾蔭權爵士禍港七年，搞到貧富懸殊，民生艱苦，鬍鬚曾身為兩朝官員，點講都有責任，依家自己補番隻鑊都好應該啫，係咪？
總而言之，財政盈餘要善用，不能再做守財奴。鬍鬚曾，你次次計錯數已經失禮，如果扶貧紓困仲要諗縮數，想唔畀人鬧係「大罪人」都幾難，叮！
