香港上海大酒店旗下嘅香港半島酒店尋日舉辦首映禮，播放一齣名為《經典．傳承》嘅紀錄片，現場布置得好有心思，除咗有個小影院，場內仲有多個仿照六、七十年代戲院嘅售票處，擺放多款懷舊小食，好似缽仔糕、龍鬚糖、糖葱餅、飛機欖等招呼嘉賓，真係有種時光倒流五十年嘅感覺！

米高嘉道理爵士（前排中）同監製Elaine Forsgate Marden（前排右）都有出席首映禮。

講番呢部紀錄片，意念其實源自大酒店非執行主席米高嘉道理爵士，原版喺九四年推出，今次放映嘅係更新版，同樣將嘉道理家族點樣打造半島酒店品牌嘅故事娓娓道來。新版本加添咗明年啟業嘅巴黎半島酒店介紹，同埋將酒店原址大樓復修、重現其昔日輝煌嘅艱巨工程。負責監製嘅係有超過三十五年製作電影電視經驗嘅Elaine Forsgate Marden，佢原來同米高係世交，仲曾為中電製作一小時紀錄片！兩人一一年重新構思製作新版紀錄片，到片尾仲發現米高囡囡Bettina係製作助理添！

第一手消息請下載on.cc東網iPhone/iPad/Android/Windows Phone Apps