城中鏡：郭家父子緣繫中大
香港中文大學成立半世紀，由當年坐落深水埗嘅「扑扑齋」，發展到今日嘅國際級學府，適逢五十周年校慶，中大嘅慶祝活動更係一浪接一浪，好似位於中大圖書館嘅大學展覽廳，獲郭得勝基金贊助籌建，尋日舉行開幕禮。唔講唔知，代表基金出席儀式嘅郭家三公子郭炳聯以至其已故父親郭得勝，原來同中大都相當有淵源。
沈祖堯（左）、郭炳聯（右）同兩個仿製嘅諾貝爾獎「水蓋」合照。
香港歷史博物館前館長丁新豹（左）同中大副校長霍泰輝（右）對展品好有興趣。
陳茂波（圈示）當年架起副粗框眼鏡，佢個樣依稀都可以認出嚟。
郭炳聯與中大同行20年
中大近日活動不時見到郭炳聯嘅蹤影，原來郭炳聯雖然唔係中大出身，但佢自九四年起先後出任中大校董、司庫，九九年出任校董會副主席至今亦已十四年，難怪中大校長沈祖堯尋日為展覽廳揭幕致詞時，都形容郭炳聯「與中大同行二十年」喇。至於郭得勝，則早喺七十年代已同幾位商界朋友，喺時任中大司庫利國偉穿針引線下，開辦夜間工商管理碩士課程，家族其後依然繼續資助中大成立獎學金同舉辦學術活動。
唔單止咁，新鴻基地產仲請咗唔少中大校友，好多更早已進身管理層，新地非執董黃奕鑑七十年代入讀新亞書院，佢當年嘅學生相都喺展覽廳展示出嚟，而同黃奕鑑同屆嘅仲有發展局局長陳茂波，可見中大見證唔少昔日嘅薯頭學生，成為現今政商界要人。
開幕禮上，郭炳聯同沈祖堯更由副校長許敬文親自率團，邊行展廳邊向佢哋解說中大歷史，其中中大博文講座教授嘅楊振寧同前校長高錕都係諾貝爾獎得主，當郭炳聯同沈祖堯被記者要求指住個仿製嘅「荷蘭水蓋」合照嗰陣，郭炳聯就向沈祖堯笠高帽，笑稱好快就輪到佢攞o架喇，引得哄堂大笑。
