貪曾喜用公帑遊山玩水，呢一次就到動物園繼續吃喝玩樂。

貪曾行到烏龜區，遇正烏龜們選大佬，食正貪曾貪威嗰瓣，當然挺其烏龜頭而出：「我要做大佬！」眾烏龜愕然：「你都想爭呢個『龜叔』嘅大位？」原來龜（第二）功能界別規定，佢哋嘅大佬尊稱「龜叔」，須本龜縮之精神，僭當香城之意見領袖，如此筍工，當然龜龜要爭。

「無錯！」貪曾顧盼自雄：「你睇吓我平時好似矮得得，其實係未着上龜殼先至咁啫！一旦着番，一定巨過『古巨龜』！仲唔配做龜王之王？」

忽然一陣冷笑聲傳嚟，「一男子」考慮因素之後話：「過氣喇你！畀你着埋龜殼，依然露出半個龜頭，又點算完全龜縮？」

貪曾一看，四下無人，的確搵唔到該名「一男子」半個影半個龜頭，此時園內眾龜亦都已經紛紛伏拜，奉「一男子」為龜界大佬。貪曾眼見非常無癮，就靜靜雞咁走去貓園。

（待續）

第一手消息請下載on.cc東網iPhone/iPad/Android/Windows Phone Apps