立法會資訊科技界議員莫乃光早前為爭取成立科技及通訊局（科技局）同特首辦互指不是產生「小風波」，間接反映業界對科技局好着急。據聞最近業界有機會同特首CY梁振英同枱傾偈，有人即問及會否設立科技局，CY回應話大家對此都有共識，只係有議員同佢提出交換條件，就係同時要設立全民退休保障，否則就「拉布」唔畀新設科技局通過，呼籲業界對外多發聲，又相信呢個結仍需時間處理。

設計圖片

科技局設立時間表仍然欠奉，首當其衝自然係商務及經濟發展局局長Greg蘇錦樑，因佢係主責通訊及科技部分政策，業界當然會「追瘦」佢，咁啱最近當局又推出同業界息息相關嘅「數碼21」諮詢文件，被業界批評為「交功課式文件」，阿Greg喺呢個內外交困嘅情況下，睇怕只可以受靶「硬食」喇！

據聞業界對呢份諮詢文件（目及）到實，其中互聯網專業協會會長洪為民等近二十人，近日各自以個人身份組成關注組，趕及明日諮詢期結束前發表長達五十多頁報告回應諮詢文件。

當局喺諮詢文件提出四個資訊科技策略重點同十八項建議，然而喺關注組角度而言，呢份諮詢文件存在「思想錯誤」，一來對本港全球競爭力排名第七沾沾自喜，二來未有認清發展科技係各個行業嘅基礎，因此建議增加科研投入，又要將科技策略「升呢」至特首辦層次等十大目標。科技界嘅目標同建議擺晒出嚟，係時候睇吓阿Greg幾有胸襟廣納意見喇！

第一手消息請下載on.cc東網iPhone/iPad/Android/Windows Phone Apps