政壇：民主阿婆吹水博見報

由「民主阿婆」陳方安生、前行政同立法局議員李鵬飛、資深大律師李志喜等組成嘅「香港2020」，幾個月前講過年底會公布普選特首方案，但拖到今時今日都未見影，尋日佢哋開記者會，原來只係講原則同立場。陳太就惟有化身時事評論員，猛講其他人建議嘅方案符唔符合《基本法》，似乎陳太真係好想講嘢博見報喎！

由於唔係公布普選方案，「香港2020」尋日只係公布政改立場書，內容都幾「阿媽係女人」，例如話提名委員會必須增加代表，先達至「廣泛代表性」，但加乜嘢界別，陳太話未有定案，總之係未有代表嘅如學生界、少數族裔界、公務員界等都可以討論。

而爭議性好大嘅公民提名，陳太似乎好有保留，佢先話公民提名無違反《基本法》，只要提名委員會內容納公民提名就得，但佢隨即又兜一個圈，話公平公正嘅提名方法有好多種，公民提名只係其中一種。咁講法，似乎連陳太都深知公民提名只係「叫價」，實際上根本難以操作。