免費電視牌照風波持續多時，早前缺席立法會資訊科技及廣播事務委員會會議嘅通訊事務管理局主席何沛謙，指該局一直支持發出三個免費電視牌照，擺明同政府唱反調。事隔十多日後，立會相關委員會再邀請佢出席下月二日舉行嘅特別會議，但佢再次推卻，再請委員會「食檸檬」，莫非佢依家一聽到「免費電視」呢四個字，就會有拒絕嘅條件反射表現？

何沛謙

何沛謙尋日以通訊局主席身份回信予委員會主席黃毓民，明確表示未能答應委員會邀請出席會議。佢話通訊局其中一個職能係就發出免費電視牌照事宜，向特首同行政會議作出建議，再三重申通訊局已適當地執行《廣播條例》訂明職能並完成有關工作，至於特首同行會如何處理有關申請，或就其申請作決定時考慮嘅因素，佢就話由於有關事宜已超出通訊局知情範圍同法定職權，不宜作出評論喎。何沛謙接連拒絕出席立會委員會認真耐人尋味，究竟有冇乜嘢不為人知內情，時間將證明一切。

第一手消息請下載on.cc東網iPhone/iPad/Android/Windows Phone Apps