政壇：梁鳳儀補睡等過冷河
政府前日正式公布財經事務及庫務局副局長梁鳳儀將喺明年一月離任，佢尋日出席一個財經論壇致詞時，講講吓經濟竟突然借題發揮，話經濟、金融市場同企業要轉型，人亦一樣，而佢從記者到金管局工作，呢個係佢人生第一次轉型，之後離開咗任職十四年嘅金管局，加入政府做副局長，呢次就係第二次轉型，期間唔單止提升咗佢嘅知識、能力同經驗，能夠服務市民，亦成為佢人生最大嘅榮譽，而即將嚟緊嘅就係佢人生中第三次轉型喇!
設計圖片及對白
換屆時已諗辭職
點解會辭職？梁鳳儀之後會見記者，就話其實喺一年多前政府換屆時已諗住辭職，呢個純屬個人決定，而喺呢個時候做有關決定較為自然，佢嘅意願一直有同局長表達，亦得到局長理解，只係當時手頭上仲有工作未完成。咁究竟係咪好似外界推測，話佢將會重返金管局呢？佢話所謂嘅「轉型」其實暫時未有具體計劃，但佢認為最重要任務係先補充番失去咗嘅睡眠。
咦！問責官員離任後，都要經過一段過冷河嘅時間，要做新嘅工作都要經過政府獨立嘅委員會審批，梁鳳儀講到補充睡眠先，係咪要等過完冷河，先轉型去新工呀？咁就只有佢自己先知嘞！
至於喺呢個時候離任會唔會打擊政府嘅士氣？梁鳳儀就話無論乜時間離開都唔合適，所以最重要係無縫交接，相信接任嘅香港按揭證券公司前總裁劉怡翔可勝任工作，因劉怡翔曾係佢嘅上司，比佢更資深，且有更多精力，而對於劉怡翔願意接受呢個挑戰，梁鳳儀話好敬佩佢。梁鳳儀咁講，莫非因為呢個廚房特別熱？
