補打疫苗訊息亂 衞生官僚又靠害

件事係咁嘅，血清三型肺炎鏈球菌連殺兩幼童，家長憂心忡忡，點知當局唔止冇釋疑解惑，反而對補打十三價疫苗訊息混亂自相矛盾，搞到家長無所適從。嗱，呢頭衞生署話唔使打，嗰頭食衞局又話資助補打，呢頭有兒科醫生呼籲盡早打，嗰頭高官又叫大家毋須鬥快打，一時一樣，各有各講，市民究竟信邊個吖？

本來呢，疫苗對疫情有冇針對性，打咗有冇效力，官老爺要毫不含糊解釋清楚，如果有用就要打，若然無效就唔使打，事情就係咁簡單，點解搞到又打又唔打咁複雜？疫苗應唔應該打，係醫學專業知識，市民茫無頭緒，只係聽官老爺一句說話，依家官方口徑不一，各說各話，家長點能夠唔憂上加憂吖！

咁講啦，十三價疫苗打定唔打尚有爭議，港產官僚該打就毫無疑問。肺炎惡菌連奪兩童性命，為人父母必然大為緊張，訊息混亂只會加深佢哋嘅焦慮，甚至引起不必要恐慌，呢個道理三歲細路仔都識，偏偏當局警覺遲鈍，自亂陣腳，唔止搞到家長暈頭轉向，更加隨時危及幼童健康添，你話係咪抵鬧吖。最大嘅恐懼就係恐懼本身，而恐懼又往往源於對危機一無所知或一知半解，港產官僚必須速速補鑊，畀市民一個安心，如果唔係，納稅人薪高糧準請你哋把鬼咩。

話時話，港府面對疫情訊息混亂都唔係第一次嘅喇。早兩年日本爆發核災，內地爆出「盲搶鹽」笑話，香港亦有唔少人加入搶鹽，歸根究柢，咪就係因為港府應對措施不力，發放訊息遲緩，無及時釋除市民疑慮囉。最好笑嘅係，時任食衞局局長周一嶽渾渾噩噩，呢頭想淡化事件，話有需要嘅市民只需自行前往醫院檢查輻射，嗰頭政府就公布喺機場設立衞生台畀市民自願檢查輻射，簡直瘀爆。今屆政府不知吸取教訓，唔通「周一嶽病毒」仲殘留體內？如果係咁，就要快啲補打疫苗喇。

點講都好喇，抗疫關乎人命，當局唔可以再掉以輕心，疫苗要打就盡快打，預防措施要做就做到足，訊息要發放就盡量清晰，唔好又累人累物吖，叮！