SUN搞作：打橫嚟講：賣剩一個黃子華
巨星即是巨星，一個「黃子華」，三隻字，就頂得上全個TVB所有男女親生與非親生的仔仔女女之總和價值。
由黃子華孭飛的無綫新劇《My盛Lady》首晚收視，成績不多亦不少，啱啱同全台總動員、千萬金圓打造出來的《萬千星輝賀台慶》的收視一模一樣，大家的平均收視為29點，最高31點。
黃子華真犀利，冇拍電視劇四年了，其表情、演技、風格和形象，一啲都無遜色，除咗瘦得叫人擔心和憐憫之外，所有，係！係所有表情演技風格和形象，都跟四年前（或更之前）一丁兒都無走樣，真「駐顏有術」，唔知用咗乜嘢防腐劑？黃子華唸對白的語調、節奏及其肢體語言的表達、伸展，跟四年前（或更之前）之《男親女愛》毫無分別。勁呀！神級之極！
商品製作就係咁o架嘞！當嗰款產品好賣有市場，就諗都唔使諗，變也不要變，照舊模繼續「啤」出嚟便是！諗多啲，不是怕嘥腦汁，而係要冒險，兼無把握！多做多錯！
《My》劇只賣黃子華一個人的「棟篤笑」，消費在他的口技就夠了！他那十年如一日的精警、刁鑽、啜核的語言藝術，有個非常長青的優點，就係避開時效性，同現今香港民情完全無關，即使四年後先首播或重播，也分別不大。
香港特區內，人們困坐愁城，終日唧都唔笑，能有一齣讓大家唔用腦、避開當今現實的苦況，躲進一個反智無聊低級喧嘩的虛擬世界裏，是一日最舒暢的一小時，何等快哉！當然，你大可選擇熄機，令自己寧靜安逸！始終，你都仲有得揀！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
