城中鏡：霍啟剛學品酒無師自通
霍英東家族長孫霍啟剛接任香港青年聯會主席後，青年工作多咗好多，早幾日青聯旗下嘅學生交流網絡舉辦品酒會，請嚟品酒師黃榮傑教年輕人摸杯底，啟剛都抽空去支持，佢仲自爆怕酸，所以鍾意濃郁嘅Full Body紅酒喎！
霍啟剛（左一）抽空去聽黃榮傑（右一）分享品酒樂，陳詠娸（右二）同青聯成員黃秀影（左二）亦趁機偷師。
留學時到酒舖尋寶
啟剛對品酒都有啲心得，不過佢學酒過程係無師自通，事關當年佢喺英國讀大學時，每逢周末就聯同一班同學去酒舖尋寶，佢哋專買啲平價酒，加上自己睇書學嘢，間唔中都搵到啲滄海遺珠。啟剛仲打比喻話，學品酒同選酒嘅過程同人生好相似，皆因有好多嘢要自己抉擇。
當日搞手係青聯副秘書長兼學界事務委員會召集人陳詠娸（Vincenza），Vincenza係德國寶董事長陳國民嘅外甥女，當日舉辦講座嘅場地係佢阿姨開嘅高級浴室用品公司，佢哋仲隨手用浴缸雪酒，夠晒創意。
