城中鏡：葉恭正滿意車隊濠江捧盃
澳門格蘭披治大賽車落幕，仁濟醫院總理葉恭正（Paul）旗下間KCMG賽車公司都有出賽，仲取得唔錯成績。阿Paul話，今次佢哋報名參加三級方程式同青年冠軍方程式系列賽兩項賽事，結果前者獲得第十三名，後者就包辦冠、亞軍，佢已經覺得好滿意。
熱愛賽車嘅葉恭正（左）啱啱喺濠江捧盃返港，右為佢嘅太太Annika。
三級方程式係每年澳門大賽車嘅重頭戲。
阿Paul解釋話，今次出賽三級方程式嘅日本車手係第一次喺澳門出戰，澳門車道出晒名難度高，所以取得十三名都算唔錯。至於青年冠軍方程式系列賽今年首次增設澳門站，佢哋摘下第一、二名，梗係開心到飛起。
曾經係賽車手嘅阿Paul笑笑口話，佢○二年曾經去澳門落場比賽，後來退居幕後成立車隊，自○八年起每年都有參賽，所以對澳門一啲都唔陌生。咁有冇心思思想落場揸番車過吓癮？曾經話要太太Annika批准至可以出賽嘅阿Paul，笑住望一望太太，睇嚟仲未攞到批文喎！
