城中鏡：仁濟打鄉情牌 爭取四叔捐地
恒基地產主席李兆基（四叔）熱心捐地，繼早前構思捐地興建青年住宿設施後，早前更公布捐贈屯門藍地一幅十萬呎地皮畀博愛醫院，之後又揚言打算捐出隔籬一幅四萬呎官地，仲話邊間醫院或機構有興趣，可以搵佢傾傾。話口未完，呢件事已引起仁濟醫院極大興趣，一眾負責人更打算搭通天地線、靠鄉情打動四叔喎！
四叔早前宣布捐地予博愛醫院興建長者設施。（資料圖片）
同月生日嘅梁昌明（右起）、嚴徐玉珊、蘇陳偉香同馮卓能齊吹蠟燭慶生。
陳李詠詩（左）幫手爭取四叔捐地，黃偉健（右）笑言要快手。
早前仁濟董事局主席梁昌明、副主席蘇陳偉香（Susan）等一眾董事局成員開生日會，眾人講起呢個新鮮熱辣嘅話題時顯得興致勃勃，咁啱仁濟總理陳李詠詩（Jenny）係順德聯誼會永遠榮譽董事，同四叔係鄉里，眾人一於推舉佢出面穿針引線，仲話要趁快喎！Jenny話，佢父親李塔源係順德聯誼會副主席，同四叔識咗好耐，希望靠鄉情搭夠，搶先一步為仁濟爭取到呢塊地。
盼辦智障人士安老院
仁濟行政總裁黃偉健就話，佢哋喺新界西提供好多社會服務，由於人口老化，老年嘅智障人士護理需求愈嚟愈大，如果可以爭取到塊地，希望可以興辦智障人士安老院。咁啱博愛醫院喺隔籬將提供可容納二千人嘅安老院，到時可以起到相輔相成效果。
當晚聚會係仁濟董事局十一月壽星嘅生日會，牛一嘅有梁昌明，仲有Susan、嚴徐玉珊同馮卓能三位副主席，真係夾都冇咁啱。明年將接任主席嘅Susan話，雖然今年經濟不景令籌款增添難度，幸好仲有好多不知名嘅善心人士捐款畀仁濟，最驚喜係佢哋放喺荃灣一間寺廟嘅錢箱，竟然有一張十萬元支票，而且最終過到數，證實唔係被整蠱。
