透視鏡：訂房網貨不對辦 外遊家庭逼住色情酒店
【投訴組報道】近年愈來愈多港人以自由行方式外遊，有市民早前偕同子女到日本旅遊，經大型酒店代理網站預訂三星級酒店房間。未料抵達後發現酒店房內充斥色情刊物及各式性用品，坦言既尷尬又憤怒，不滿現有法例對消費者毫無保障。法律界人士警告，網站倘若非在香港註冊，即使貨品或服務不對辦，市民亦難以追討。
尷尬
曾先生早前透過大型酒店代理網站預訂日本酒店房間，到達後發現竟為色情酒店。
酒店房內擺放多本成人雜誌，疑為色情酒店。
房間內竟放有情趣玩具，令曾先生一家大感尷尬。
房內有性感內衣販賣機，與酒店代理網站提供的資料大相逕庭。
經本報轉介後，有關網站旋即加設入住酒店的年齡限制資料。
多做功課
李小姐：好彩我暫時都未試過訂酒店有貨不對辦，最好都係上網睇咗評價先，或者去旅行社訂囉。
錢先生：我覺得訂酒店之前最好去官網睇資料，做足功課先好訂，咁就穩陣啲！
胡小姐：之前都試過上網訂酒店，話明五星級，但去到好似間舊賓館咁，當時都覺得投訴無門！
「個網話係三星級，但就完全冇講過係色情酒店，啲相同普通酒店冇分別，點知一入到房就見到啲三級書，房入面仲有部機賣性玩具同性感內衣褲。我啲細路咁細，都唔知點同佢哋解釋，真係該煨！」曾先生一家三口早前與親友聯袂到日本旅遊，事前透過大型酒店代理網站預訂酒店房間，惟甫抵埗後即發現「貨不對辦」。
曾指當晚到埗後已夜深，與家人即使不滿仍要入住，卻坦言「住不安心」，「間房唔止多色情嘢，仲要開、閂門都要搵職員開鎖同解鎖，咁走火警點算？所以我哋都冇鎖門瞓，成晚眼光光瞓唔着！」
海外註冊 出事難追究
曾不滿網站未有註明酒店性質，返港後即時投訴，職員卻稱須自行向海外總公司反映，至於網上留言更遭刪除，「佢話我嘅意見內容有人身攻擊，唔可以刊登，但我只係將個事實反映出嚟！」
有關酒店代理網站發言人表示，事後已於網頁註明入住酒店的年齡限制，但對於被指擅自「過濾」顧客留言，以及過去一年接獲相關投訴數字等問題，發言人則未有回應。
不過，曾先生指有關網站至今仍未就其投訴作任何回應，坦言對網上訂購酒店服務信心盡失，「自己喺網上面搵代理訂（酒店）係好方便，仲可能平啲，但原來咁冇保障，真係好失望！」
「好多酒店代理網站都係喺外國註冊，香港冇管轄權，就算有咩事發生，市民都好難追究！」法律界人士黃國桐指出，現時網絡資訊發達，市民能輕易透過不同網站購物或預訂服務，惟網站所屬公司一旦並非在香港註冊，則不受香港法例監管。即使網站未有按本港的《商品說明條例》列明服務或產品資料，或市民遇上貨不對辦亦難以追討。
消費者委員會發言人則說，去年共錄得二百一十九宗有關網上購買機票、酒店預訂及旅遊事務的投訴，但今年上半年已有二百二十八宗，較去年同期的一百一十五宗激增近一倍。
發言人又提醒市民，單憑酒店代理網站資料未必能準確了解酒店質素，建議市民訂購前應先多作查詢及比較。
