政壇：搞搞政：梁繼昌為囝囝學業鎖電視
為人父母經常要同仔女鬥法，立法會議員梁繼昌（Kenneth）都有呢個煩惱，事關佢九歲嘅囝囝太鍾意睇電視，一睇可以睇成十個鐘，沉迷電視嘅其中一個副作用就係影響成績，功課亦唔係做得幾好，結果Kenneth喺家中推行「熄電視令」，但佢買部有密碼嘅電視，阿仔都可以成功破解密碼，最後Kenneth要出到頻密改密碼呢招，至可以令仔仔嘅專注力返番書本。
設計圖片及對白
Kenneth話，佢屋企部LG電視有密碼鎖功能，佢預校咗個密碼，令囝囝唔可以自己開電視睇，但都唔係百分百有效，因為囝囝都有撞中密碼成功解鎖嘅時候，佢惟有頻密啲改密碼。不過，佢囡囡功課唔錯，間房嘅電腦有得無限上網，有時細佬都會入去偷偷上網，搞到家姐都要配合父母嘅絕招，用密碼鎖住部電腦。
另外，Kenneth呢排研究緊財務匯報局上個月發表嘅獨立審計監管改革報告，話會計界唔介意交出公會紀律聆訊嘅調查、檢控同懲處權，不過就應該交由獨立嘅審裁處做，以免財匯局獨攬大權喎。
