喺九龍塘住嘅林大輝，尋日老遠去到馬鞍山撐街市翻新。
立法會尋日開大會，但家住九龍、一直被傳好想去新界東直選嘅工業界立法會議員林大輝卻無準時現身十一點開始嘅立法會會議，反而去咗馬鞍山一個最近翻新嘅屋邨街市做開幕禮嘉賓，致辭時仲擺晒佢太太、媽媽同外母上枱添。
擺老婆阿媽外母上枱
大輝有會唔開走去街市，致辭嗰陣就話自己仲停留喺二十年前，覺得街市係污糟、好焗、濕淋淋同埋無管理嘅地方，然後就大讚翻新咗嘅街市帶畀人不一樣嘅感受，建議家庭主婦同埋佢哋嘅另一半齊齊享受買餸體驗，聲言咁可以令家庭更和諧同美滿喎！
佢大賣口乖之後就話要趕住返立法會，不過搭車途中會打電話畀老婆、阿媽同埋外母，話第日會做吓好老公同埋孝順仔，陪佢哋老遠由九龍走入馬鞍山呢個街市買餸。其實佢提早喺新東出現，都係為拉票啫，又何必擺咁多人上枱呢？
第一手消息請下載on.cc東網
