暑假前，政府擴建堆填區嘅方案觸礁，官場中唔止一次有風聲話政府好快重新再嚟過，依家比較明確嘅訊息係最快明年第一季就要再為擴建將軍澳、屯門同北區三個堆填區闖關。圍繞堆填區嘅爭議唔少，其中一樣係政府推行嘅環保工作唔夠，據講，有地區人士曾經建議港府學吓內地部分省市，廢物處理時又可以發電，咁樣咪容易爭取支持囉！點知，黃錦星對呢項建議好似冇乜興趣，冷言冷語咁話：「邊有咁容易吖！」
林鄭未必再幫拖
究竟黃錦星係對內地呢項廢物發電嘅設施冇興趣吖，定係覺得引入呢種設施無助推銷呢﹖只有佢至知，但地區人士就覺得黃錦星唔夠主動，亦唔夠謙虛囉。要知道，堆填區再闖立會係一場硬仗，佢除咗早前落區視察改裝密封垃圾車以及到長洲出席環保活動外，未見佢有乜特別招數去疏導地區人士嘅不滿情緒。
而且，政務司司長林鄭月娥明年初將領軍做政改諮詢，嚟緊未必會好似上次咁全力幫佢一把，黃錦星仲唔積極啲，唔通想再觸礁咩！
第一手消息請下載on.cc東網
