政壇：波波落區捱鬧顯示誠意
應屆政府其中一大任務係搵地，主理呢項工作嘅其中一名問責局局長正係早前陷入囤地風波嘅發展局局長陳茂波（Paul），捱過連串批評之後，近日波波開始積極落區，「打不還口，罵不還手」嘅態度，據講都可以收到啲啲效果，就係畀受影響嘅村民消消氣。
波波近日開始積極落區，「打不還口，罵不還手」，畀受影響嘅村民消消氣。（資料圖片）
建制派議員教路
發展局今年七月初公布新界東北發展計劃修訂方案後，波波被「揭發」佢老婆外家喺區內有地，遭受各方抨擊之餘，要理性討論新界東北發展計劃細節根本係天方夜譚。近排隨住爭議丟淡，波波重新出發，化被動為主動，先後視察古洞北同粉嶺北等地，期間少不免要同受影響人士短兵相接，另外有示威人士亦聞風而至如影隨形，幸好小小嘅擾攘未演變成大事件。
究竟波波突然勇猛落區有乜因由呢？據悉，較早一段時間佢曾私下向建制派議員取經，睇吓有乜妙計良方再推進新界東北發展計劃，較多人提出嘅，都係叫佢始終要乖乖落區同受影響嘅持份者直接對話，就係咁，呢排佢踴躍落區，畀人鬧都起碼顯示誠意，鄉事消息話唔係冇效o架，唔知咁會唔會刺激佢更多落區呢？
