現年三十五歲嘅吳宗權，明年一月一號起出任會德豐主席。（資料圖片）
會德豐尋日有「換班」大宣布，明年一月一號開始，原任主席的吳光正將退居董事，由佢嘅孻仔吳宗權（Douglas）升做主席，今次亦係本港首個完成由第三代接班嘅知名家族。現年三十五歲嘅Douglas近年喺社交圈同運動界都好活躍，身形高大嘅佢文武雙全，曾經任職過投資大行瑞銀，負責過併購同資產管理嘅工作，亦對家族嘅地產業務瞭如指掌。
船王包玉剛逝世後，女婿吳光正喺八六年正式擔大旗，出任會德豐主席，Douglas接手後，就係第三代接班人。Douglas喺會德豐地產做咗八年之後，舊年年中「入局」，做咗一年董事，就升做主席，都算快手。佢入局嘅時候，市場已猜測係為接班鋪路，而五個月前，吳光正被問及幾時交棒，佢話愈快愈好。吳光正明年一月一號起，將使用「高級董事」嘅職銜。
曾勇救遇溺婆婆
唔講唔知，身形高大嘅Douglas係運動健將，曾經贏過渣打馬拉松領袖盃冠軍，又參與「維港渡海泳」同「公益金會德豐百萬泳」等大型賽事，仲試過喺跑步時，勇救一位遇溺嘅婆婆添。
第一手消息請下載on.cc東網
