政壇：范國威辣慶蔣麗芸
食煙有損健康，仲好惹火添！我哋啱啱同大家報道過立法會議員要各司其法煲煙之後，議會內就因煙起爭拗。事關建仔蔣麗芸（Ann）爆響口指新民主同盟嘅范國威（Gary）亦有食煙，Gary尋日反應神速，攞住個寫上「元秋堂生草藥」嘅紙袋企喺會議廳門口攔截阿Ann，揶揄對方噏得就噏。阿Ann亦不甘示弱，當住記者面前上演一幕對質大戰，雙方吵鬧、過招一輪後，都係冇乜下文。不過，阿Ann就再爆有人見過Gary同其他人喺議員休息室排排坐煲煙喎，睇嚟呢單煙之疑團有排都未收得科。
立會各層貼反吸煙貼紙
阿Ann日前承認自己偶有吸煙，言談間亦指Gary都有份，尋日立法會開大會，會前就見Gary攞住個寫上「元秋堂生草藥」嘅紙袋企喺會議廳門口，諗住等阿Ann行入會議廳時交畀佢，當阿Ann行近會議廳時，Gary試圖上前將包生草藥交畀阿Ann，矢言自己無食過煙，又批評阿Ann嘅言論無事實根據，咁講對佢唔公道，又揶揄對方係生草藥噏得就噏。本來唔多想理嘅阿Ann漸被激起把火，猛問Gary：「你講完未？」又話自己已經大方承認曾經食過煙，唔會呃人話自己無食過煙。
阿Ann跟住停下腳步，同Gary正面交鋒，話曾經有議員見過Gary喺五樓嘅議員休息室內同其他訪客一齊食煙，呢個時候，阿Ann愈講愈大聲，仲高聲反問Gary：「你有無食過煙？你有無食過煙？」期間阿Ann隻手仲掂到Gary嘅右肩，嚇到Gary即時大叫：「你唔好掂我！」
照計成年人食唔食煙係自己選擇，最大影響係自己嘅健康同身邊嘅人，咁樣喺立法會內公然駁火，真係得啖笑。
講開吸煙，行管會上禮拜二開會，有委員投訴近期成日喺立會內聞到好大陣煙味，行管會於是決定喺每一層樓貼上反吸煙貼紙，提醒議員同職員們唔好喺立會大樓範圍內吸煙。
