深圳學額得啖笑 雙非炸彈繼續爆
年年歲歲花相似，小一自行分配學位尋日公布結果，例牌又係有人歡喜有人愁。唔同嘅係，由於雙非學童湧港爭位，今年北區學生獲取成功率全港最低，於是搞到怨聲載道，亂象叢生，兩地家長一樣愁。事實證明，雙非問題手尾長，炸彈一日唔拆除，社會都無日安寧o架。
咁點拆彈呢？嗱，咁啱得咁蹺，港府同深圳政府尋日舉行合作會議，簽訂嘅其中一項協議就係為雙非學童而設，具體做法係將現時嘅「港人子弟班」改名為「港籍學生班」，名正言順吸納呢班兩地小人球，預計下學年名額一千六百個，課程銜接香港中學，但港府唔會提供資助。
即係咁，深圳雙非，深圳讀書，思路係啱嘅。話晒讀書郎小小年紀，日日山長水遠舟車勞頓過關往返，求學之路比人更加疲累同艱辛。所以咯喎，若然港籍學生班一舉成功，無論對雙非學童同本地學童來講，不失為雙贏方案嚟o架。問題係，呢個所謂嘅新措施，唓，原來又係得個樣嘅咋。
睇真啲，港籍學生班話就話名額一千六百個，其實本身讀緊嘅學生已經有一千四百個，即係實際新增嘅名額只得二百個咁大把。相對數以萬計嘅適齡入學雙非童，二百個學額猶如滄海一粟，連杯水車薪都講唔上啦。港府信誓旦旦解決雙非學童問題，結果搞一大輪只係擠出二百個學額，仲話提供多一個選擇喎，你話係咪虛偽吖。
講到尾，呢份合作協議根本只係一場騷。雙非兒童喺港人子弟學校求學嘅現象早就存在，港深政府大鑼大鼓吹噓成新猷措施，根本象徵意義大於實際，而且係將後知後覺嘅政策失誤當成別具慧眼嘅教育政績，笑掉人哋大牙。兩地家長靠港產官僚解決子女學位問題，簡直就好似教育局局長吳克儉個名一樣，唔得掂！
嗱，話港產官僚整色整水，冇講錯o架。試諗吓，港府既然知道深圳就讀係解決雙非學童嘅正道，而庫房水浸唔缺錢，亦唔缺師資，如果真係急家長所急，點解唔索性喺深圳開辦官校或者津校呢？唔好忘記，雙非兒童都係香港居民喎，獲港府關顧乃應有之義，港產官僚捨正道而弗由，咪話太一叮踢爆，佢哋根本就係懶得就懶，一心將雙非學童當包袱踢開就算。
咁講啦，接受教育係基本人權，香港堂堂國際大都會，連入學讀書都搞到一位難求，乜形象都丟晒啦。唔該港府快快認真拆除雙非炸彈，如果唔係，下年派位又係七國咁亂嘅咋，叮！
