「美容教主」鄭明明尋日出席美容學院第四十八屆畢業典禮，咁啱尋日就係佢生日，佢透露會同好友一齊慶祝，生日願望係身體健康。提到日前嘅搶B案，佢話平日一定會叫傭人睇緊孫兒，以前都會安排孫兒到內地學國語，但依家就唔敢嘞，因多年前，曾喺大陸爭啲走失孫女。

鄭明明話平日一定會叫傭人睇緊小朋友。

明明姐話：「當時孫女得六、七歲大，我同個女（陳維黛）帶佢去行商場，點知佢好貪靚，自己走咗去修甲。我哋發現唔見咗佢好緊張，搵咗兩個鐘都搵唔到，我哋真係崩潰，我個女仲緊張到喊。後尾好彩搵番佢，原來佢聽到尋人廣播，但係都冇嚟搵我哋，因為指甲未整好。」

第一手消息請下載on.cc東網iPhone/iPad/Android/Windows Phone Apps